Совет-Америка килешеүҙәре нигеҙендә, ерҙә йәки
океандарҙа бәләгә тарыған экспедицияларҙы
ҡотҡарыу өсөн махсус юлдаш-ҡотҡарғыстар —
«КОСПАС —САРСАТ» системаһы эшләй башланы.
Газеталарҙан.
Сыҡты юлдаш-ҡотҡарғыстар
Сикһеҙ йыһан киңлегенә,
«КОСПАС — САРСАТ» ер тирәләй
Оса ваҡыт тиҙлегендә.
Ә кем өсөн был мөғжизә,
Кемде кемдән ҡотҡарырға? —
Туҡтамаһа әгәр ерҙә
Үлтерештәр, үрт һалыуҙар?..
КОСПАС — САРСАТ!
Барам сарсап!
Үҙ еремдә — бишегемдә
Ҡотом осоп торам ҡарап,
Ниндәй хозур, гүзәл ерҙәр
Булды харап, була харап!
Ҡотҡарыусы системабыҙ,
Ҡотҡар әйҙә, ҡулдан килһә,
Яҙлыҡтыҡ беҙ, һүнде маяҡ,
Терәлдек килеп көрсөккә!..
КОСПАС — САРСАТ!
Янам сарсап!
Еребеҙҙә бөтәбеҙ ҙә
Теләйбеҙ ҙә — килеп сыҡмай,
Һыуһын ҡанмай,
хыял ашмай.
Хаҡлыҡ ҡайҙа — белеп булмай.
КОСПАС — САРСАТ,
Һис юҡ форсат
Ҡотҡарырға кешелекте —
Ере бөлә,
Һыуы кибә,
Теле бөтә.
Йәне үлә...
Еребеҙҙе ҡотҡармағас,
Илебеҙгә ҡот ҡунмағас,
Телебеҙҙе аңламағас,
Моңобоҙҙо яҡламағас,
Йәнебеҙҙе һаҡламағас... —
КОСПАС — САРСАТ!
Осма ҡабат,
Юҡҡа сыҡ йә үл йыһанда,
Хәжәт түгел беҙгә ундай
Йәнһеҙ һаҡсы — бушбаш һалдат.
КОСПАС — САРСАТ!
Ауам сарсап...