Каруан кисә

 

Эт өрә — каруан кисә.

Халыҡ мәҡәле.

 

1

 

Алыҫ илдән, зиннәт артып,

Ашыҡмайса каруан килә.

Сүллектәрҙә ҡом бураны

Ҡаршы ала —

Каруан кисә.

Сәхрәләрҙә киң даръялар

ташып ята —

Каруан кисә.

Урмандарҙа юлбаҫарҙар

аңдып ҡарай —

Каруан кисә.

Урамдарҙа алабайҙар

Һаулап ҡала —

Каруан кисә...

 

 

2

Сиктәр аша ғали бер йән

Ике илде ыҙғыштырмаҡ,

Ялғандарға нигеҙләнеп,

Араларҙы боҙоштормаҡ;

Булмағанды булды, тиеп,

Юҡты барға әүештермәк;

Дошмандың һәр орған ташын

Аш-табышҡа тәүештермәк;

Асыҡ ҡулды, тура һүҙҙе,

Ҡырын һаплап, кәүештермәк;

Үҙ еренең бар мәғдәнен

Капиталға ҡауыштырмаҡ;

Мөмкин  булһа,  илен һатып,

Дуҫ-иште лә алыштырмаҡ...

Аҡсарлаҡтар, сырылдашып,

Баҫырмы һуң тулҡын дауын?

Аҡсарлаҡтар шымыу менән

Баҫыламы диңгеҙ шауы?..

 

3

 

Елдәр иҫә, ҡомдар өйә,

Ә юлсылар барыбер үтә.

Аҡсарлаҡтар сырылдаша —

Диңгеҙ олпат: ярһый, таша.

Кемдер берәү таяҡ тыға

Барған Тарих ҡулсаһына.

Таяҡ һына,

Заман елә,

Түгел яҙмыш ыңғайына.

Эттәр өрә —

Каруан йөрөй,

Каруан кисә, каруан кисә...