Имсәкташ

 

Алтай шағиры Диман Белековҡа.

 

Катунь-йылға бүләк итте миңә

Имсәк һынлы бер таш — имсәкташ.

Хәтерләтте был таш ҡарттар һүҙен:

«Алтай, башҡорт — ҡәрҙәш,

имсәктәш…”

 

Катунь-ҡатын,

Ғәйрәт сәсер йылға, —

Бей-йылғаның булған бисәһе[1].

Алтай менән башҡорт шул ҡатындың

Имеп үҫкән ике имсәген.

 

Алтын Алтай тауын ғәзиз  күреп,

Тороп ҡалған алтай туғаным.

Имсәктәштәр шулай Саҡ-Суҡ кеүек

Аймылышҡан, ситтә юғалып...

 

Ҡатын-йылға!

Ҡаты ярһыуыңды

Аңлайым мин, тоям барын да,

Бейә елененә морон төрткән

Ҡолонсаҡтай торам ярыңда.

 

Әллә минме —

Хас күскенсе бер йән,

Далаларҙы гиҙгән бер балаң?

«Әсәй!..» тигән йөрәк өҙгөс тауыш

Асырғанып кинәт йән талай.

 

Алтай туған! —

Ҡәрҙәш, имсәктәшем,

Алтай-Урал — уртаҡ илебеҙ.

Әммә ерҙәр генә  бүленмәгән,

Бүленгән бит хатта йәнебеҙ.

 

Оноттоҡ беҙ уртаҡ әсәйҙе лә,

Һыуындырҙы йылдар, имсәктәш!..

Ташҡа әйләнгән ҡатын имсәгендәй,

Устарымда һыҙлай имсәкташ...

1991.