Балҡантау бөркөтө

 

Башҡортостандың халыҡ яҙыусыһы

Әхиәр Хәкимгә.

 

Һауаларҙа,

киреп ҡанаттарын,

Мәғрур бөркөт ерҙе күҙәтә.

Ул эҙләмәй ерҙән ҡорбан, табыш,

Донъя фанилығын киҫәтә.

 

Һәм абайлай: көмөш ҡылғандарҙың

Башын эйгән хәтәр елдәрҙе,

Ат тояҡҡайҙары иҙеп үткән

Ғүмерҙәре зая гөлдәрҙе...

 

Күҙ алдында кеүек:

Заятүләк

Һыуһылыуын тотҡан тамаша...

Ил күҙ йәшен быуат-быуат йыйған

Асылыкүлдән күҙҙәр ҡамаша...

 

Саңҡый бөркөт,

кинәт ишеткәндә

Дала үңеренән һарҡылып,

Шәреҡ шаны һеңгән думбыраның

Һарһылып та сыҡҡан зар-моңон.

 

Саңҡый бөркөт!

Шыйлай ҡанаттары,

Балҡантауҙар тора тыңланып,

 Асылыкүлдәр,

Ҡандракулдәр тертләй,

Бөркөт саңҡыуынан шомланып.

Ярһытамы уны думбыра сыңы,

Солғай микән әллә һағышҡа —

Күккә һыймай,

үрләй,

үрһәләнә,

Ҡаурыйҙарын өтөп ҡояшҡа.

 

Оса бөркөт,

Ерҙең хыял, ғәмен

Һәм ғәйрәтен үҙенә йыйғандай..

Ә думбыра — ерҙә,

Ир ҡулында,

Шаңдауҙары иңрәй йыһанда...

1999.