Ярлығас

Киңлектә юғалған ауыл —

Дала нуры, Ярлығас,

Осоп барып эҙләп таптым,

Йондоҙҙарың ҡабынғас...

 

Эй, Ярлығас, Ярлығасым,

Далаң — ярлы, яланғас,

Өйөң — утһыҙ, кешең ас.

Ҡылғандар бары һыҙғырған

Ҡыуан елдән таланғас.

 

Йәйрәп ятҡан аҡ далаға

Бер хужа һин, Ярлығас.

Ә булған мәл — әйткәндәр бит:

«Бай ере был, ярлы, ҡас!..»

 

Ярлығасты ярлыҡарлыҡ

Ирек таңы ҡыйылғас,

Далаң ҡәҙергә  туйынған,

Алпауыттар ҡыуылғас...

 

Палаткалар ҙа өҫтәне

Далаға тормош йәмен.

Ил табынына өҫтәлде

Сиҙәм икмәге тәме.

 

Киңлектә балҡыған ауыл —

Дала ҡото, Ярлығас,

Осоп барып эҙләп таптым,

Йондоҙҙарың ҡабынғас.

 

Бөгөн яңы йәшлегеңде

Кисерәһең, Ярлығас, —

Сөм-ҡара бураҙнаң тулып

Ап-аҡ бәхет яралғас!