Торналар тубы[1]

(Йыр)

 

Сыңрай-сыңрай осоп бара

Торналар тубы.

Шул аһәң-моңдо оҙатам

Күңелем тулып…

 

Ергә килә, ерҙән китә

Ғүмер – йыр тубы.

Кешеләр ҡала оҙатып,

Күңеле тулып…

 

Быуат-быуат яңғырарҙай

Йыр туптары бар.

Уларға күңел күге ни?! –

Киң йыһан да тар…

 

Дуҫым!

Инде сыңрап оса

Беҙҙең йыр тубы.

Ул була алырмы икән

Быуыным моңо?

Яңғырармы ерҙә сыңы

Ваҡытты уҙып!..

 

Сыңрай-сыңрай күкте һыҙа

Торналар тубы…

Иҫкәртеүен, гүйә, яҙа

Йөрәккә уйып,

Йөрәккә уйып…

 

[1] Нур Дауытов музыкаһы.