Ер ҡуйыны күпме серҙәр һаҡлай!..
Уйы етмәй ғалим халҡының.
Алтын тапһаҡ – башҡорттоҡо түгел,
Сарматтарҙың ғына алтыны.
Сармат беҙҙең ергә ҡалдырмаған
Алтынының күмеп артығын.
Башҡорт айыра белгән Уралында
“Һары мәте” - алтын балсығын.
Башҡорттоҡо түгел икән әгәр
Башҡорт ерҙәренең алтыны,
Телебеҙҙән ниңә осоп тора
“Һары мәте” һүҙе талпынып?!
Ул алтындар - башҡорт еренеке,
Нисек кенә уны атама!
Ә тарихта бары тороп ҡалған
“Һары мәте” тигән атама.
2007.