Ағиҙелдә көҙгө боҙҙар китә,
Көҙгө боҙҙар — көҙгө ҡалынлыҡ.
Һуңға ҡалып урған уңыштарым
Шул боҙҙарға ғына һалырлыҡ,
Боҙҙар менән генә ағырлыҡ...
Көҙгө боҙҙар аға Ағиҙелдә,
Көн туңдыра, берсә йылыта.
Тормош ниңә миҙгелдәрҙәй төрлө:
Бер көлдөрә, берсә илата...
Йылыларын көтһәң — һыуыта.
Көҙгө боҙҙар...
Сыңрап-сыңрап осҡан
Күк торналар кеүек, Иҙелдә
Сайҡалышып, һалмаҡ талпынышып,
Моң даръяһын һаман гиҙеүҙә...
Ниҙәр бара шул күк теҙемдә?
Һағышмы ул,
Яҡты шатлыҡ мәллә
Күк боҙҙарға бара тейәлеп?
Булмаһынсы унда яман-яфа,
Бары шатлыҡ барһын өйөлөп,
Көмөш моңдар сыңы эйәреп...
Боҙҙар!
Урып-йыйған уңыштарым әле
Һеҙгә генә һағып аҡмалы;
Һеҙгә генә һалып ағыҙмалы,
Көмөш тулҡын ғына ҡаҡмалы,
Ынйыларға манып алмалы...
Аҙ булһа ла,
Көтмәм ярҙай боҙҙа
Яҙын ағып килер бәхетте.
Көҙгө боҙға һағып, аҡ, шатлығым,—
Ерҙә нығыт йәшәү тәхетен;
Шунда ғына был тынғыһыҙ күңел
Табыр, бәлки, донъя рәхәтен...