Ҡараса ҡауырһыны

Йәйәләй кирелде офоҡтар,
Шәм кеүек тоҡанды уҫаҡтар,
Алтынға мансылды ҡосаҡтар.
Саҡыра урманда усаҡтар...

Хозурлыҡ - йәннәттең үҙеме,
Шағирҙың “Болдино көҙө”мө?
Йәлләмәй төҫтәрҙе, буяуҙы
Иртәнән еремә нур яуҙы.

Ҡырҙарҙан алтын көҙ үткәне,
Тыныуҙа - ҡараса еткәне,
Ҡолаҡҡа эленде сыңдары –
Таң менән ҡараҡаҙ киткәне.

Ҡараҡаҙ ҡаурыйын ҡалдырҙы,
Ялҡыны усымды яндырҙы.
Яҙмыштың был миңә бүләге,
Әжерен йыр менән түләрмен.

Ҡараса - ҡараҡаҙ һыуығы.
Усымды яндыра ҡаурыйы.
Ҡауырһын осонан йыр тамыр.
Ҡараҡаҙ ҡайтырға юл табыр...

ноябрь, 2008.