Минең моңом, минең идеалым
Ҡайҙарҙа оса, тартып үҙенә?..
Көндән ҡасып, төндән йәшенәме,
Күренмәйсә күптән күҙемә?
Саҡ ишетһәм, ҡурҡам, тыныр, тиеп,
Оялтырмын, тиеп, тағы ла.
Бер юғалтһам, йәнә көн-төн тимәй,
Көтәм үҙен, өҙөлөп һағынам.
Минең моңом, минең идеалым,
Йыуанысым, яҡты хыялым,
Бер саҡ киләсәгем – күрәсәгем,
Килмәй һаман йөрөй оялып…
Килә алмаһаң,
тик бер өн сығар,
Һине эҙләп, үҙем юл сығам.