Һарытауҙың тупрағына
Береккән кендегегеҙ.
Уралыбыҙҙан бүленеп,
Хаҡ яҙмышҡа күндегеҙ.
Тамырҙарығыҙ – Уралда,
Асыл Башҡортостанда.
Шәжәрәгеҙ – һәр ырыуҙа,
Туғанлыҡ – телдә, ҡанда.
Кәмәлек буйҙарын йәмләй
Һарытау ауылдары,
Берүк ботарлап үтмәһен
Замана дауылдары.
Бөйөк Һырт өҫтәре әллә
Яҙын лаулап янамы? –
Был – яҙһылыу ер түшенә
Ләлә шәмдәр ҡаҙаны.
Кәмәлек, Ырғыҙ һыуҙары -
Һыуһындарың ҡанмалы.
Тюльпандар яҙ ялҡынланһын,
Ерегеҙ генә янмаһын!
Томандар ҡуйырғанда ла
Янһын рухың уттары.
Тарҡалмағыҙ, аҙашмағыҙ,
Һарытау башҡорттары,
Һарытау башҡорттары!
2005.