Бейеүсе

Әнүәр Ишбирҙинға

 

Улың бейей, һин баҫҡанһың

Сәхнә артына,

Улың түгел, гүйә, үҙең —

Бәйге атында.

 

Бар ҡөҙрәтең, барса уйың —

Күҙ ҡарашыңда,

Бейейһең һин улың менән

Шул торошоңда.

 

Әйттереп баҫмаһа улың,

Һин әйттерәһең.

Теттереп баҫмаһа улың,

Һин теттерәһең.

 

Талпынаһың — бына-бына

Осоп китерлек,

Дәрт-дарманың илдән илгә

Сәләм илтерлек...

 

Бөркөт тә шулай өйрәтә

Үҙе балаһын,

Бейеклекте, иреклекте

Яулап алаһын...

 

Улың бейей.

Саҡ тораһың —

Тулай күңелең,

Ҡарашыңда:

Осҡон сәсеп,

Бейей ғүмерең!..